Identifikohu

TIRANË- Kreu i PS-së, Edi Rama, njëherësh kryetar i bashkisë së kryeqytetit i është drejtuar Prokurorisë së Përgjithshme me një padi ndaj Sali Berishës për shpifje dhe fyerje për shkak të detyrës. Pas valës së fjalimeve fyese në adresë të tij dhe familjes, Rama ka kërkuar nga Prokurorja e Përgjithshme legjitimimin e të dëmtuarit në cilësinë e paditësit civil në procesin penal ndaj Berishës, me qëllim shpërblimin e dëmit të shkaktuar. Padia penale eshte dorezuar sot nga avokatet Arian Salati dhe Eno Bushi.

Vetëm pak ditë më parë, nëna e tij, Aneta Rama iu drejtua Gjykatës së Tiranës me padi ndaj Berishës.

Më poshtë mund të lexoni të ploptë padinë e Ramës:

K A L L Ë Z I M
KALLËZUESI : Edi Rama, i biri i Kristaqit , i vtl. 1964, lindur dhe banues në Tiranë, me adresë PSSH, Sheshi "Austria", nr. 91.

KUNDËR : Sali Berisha, i biri i Ramës, i vtl. 1944, lindur në Viçidol, Tropojë dhe banues në Tiranë, me adresë Këshilli i Ministrave i RSH, Blv. "Dëshmorët e Kombit", Tiranë.

ME OBJEKT : 1) Regjistrimin e procedimit penal dhe fillimin e hetimeve ndaj shtetasit Sali Berisha, për kryerjen në dëmin tim të veprave penale të shpifjes dhe të fyerjes për shkak të detyrës, të kryera botërisht, parashikuar nga nenet 240/2 dhe 239/2 të Kodit Penal;

2) Legjitimimin e të dëmtuarit në cilësinë e paditësit civil në procesin penal ndaj të kallëzuarit prej meje, me qëllim shpërblimin e dëmit të shkaktuar.

BAZA LIGJORE : Nenet 58, 75/b, 284 dhe 62 të KPrP.

PROKURORISË SË PËRGJITHSHME

T I R A N Ë

Zonja Prokurore e Përgjithshme,

Në cilësinë e personit të dëmtuar nga vepra penale e kryer, kallëzoj me anën e këtij akti shtetasin Sali Ram Berisha, me detyrë Kryeministër i Republikës së Shqipërisë, pasi në mënyrë të përsëritur dhe botërisht ka konsumuar, në dëmin tim, veprat penale të shpifjes për shkak të detyrës dhe të fyerjes për shkak të detyrës si Kryetar i Partisë Socialiste të Shqipërisë dhe Kryetar i Bashkisë së Tiranës, parashikuar përkatësisht nga nenet 240/2 dhe 239/2 të Kodit Penal.

Veprat e mësipërme janë konsumuar në Kuvendin e Shqipërisë, gjatë fjalës së mbajtur në seancën plenare të datës 26.11.2009 dhe në konferencën për shtyp të dhënë në datën 02.12.2009.

I. Gjatë fjalës së mbajtur në datën 26.11.2009 në Kuvendin e Shqipërisë, deputeti Sali Berisha ka përhapur botërisht thëniet e mëposhtme, të cituara në vijim në ligjëratë të drejtë :

1. "Cili është ai burrë që bashkëshorten e vet e akuzon se e ka djalin me të atin e tij ...? Zoti Rama, thuaju shqiptarëve cili është ai baba që i mohon djalit kafshatën e gojës? Çfarëdo që të ketë bërë djali, kafshata nuk mohohet! Aq më tepër që ai ka qenë i vogël, i mitur..." Në vijim të sulmeve shpifëse ai artikulon frazën: "Ti akuzon babën si baba të djalit!". Pohoj me bindje e përgjegjësi të plotë para ligjit e shoqërisë përmbajtjen shpifëse të këtyre frazave që nuk kanë absolutisht asgjë të vërtetë. Unë nuk kam bërë e as çuar kurrë ndërmend akuza të tilla të përbindshme, të cilat i hedh poshtë me neveri, kurse djalit tim i kam blatuar të gjithë dashurinë, kujdesin dhe ndihmën e nevojshme për t'u rritur dhe edukuar normalisht.

2. Duke shpifur për gjoja devijime të jetës sime intime, i kallëzuari nxjerr fjalët e mëposhtme : "Zoti Rama, cili është ai burrë i cili ngrihet nga shtrati i së shoqes në kullën e Myslym Pezës dhe shkon në shtratin e Dashit dhe e detyron gruan e tij të largohet natën e lemeritur?". Kjo është një tjetër shpifje e pashembullt që meriton të gjithë neverinë time, por edhe ndëshkimin e ligjit.

3. I kallëzuari shpif edhe për gjoja dhunë të përdorur prej meje në publik ndaj bashkëshortes: "Zoti Rama, më thuaj, cili është ai burrë që e rreh si kafshë te Piazza dhe i mbush fytyrën me gjak bashkëshortes në prani të personaliteteve shqiptare dhe kosovare?". S'ka absolutisht asgjë tjetër përveç shpifjes edhe në monstruozitetin e sipërcituar dhe nënvizoj se kurrë, në asnjë rast dhe për asnjë arsye, jeta ime s'ka pasur të bëjë me dhunën ndaj kujtdoqoftë.

4. Duke iu drejtuar nënës sime Aneta Rama, i kallëzuari Sali Berisha shqipton fjalët e mëposhtme: "Tani do t'i them zonjës: kam shumë respekt për ty po do ishte në nderin tënd dhe të integritetit tënd që t'u tregosh shqiptarëve që e ke mjekuar djalin tënd 10 vjet për skizofreni! ... dil me kurajo si nënë shqiptare dhe thuaju të vërtetën, e ngrihu mbi sentimentet e një djali që të ka nxjerrë me lecka, nga shtëpia e tij, me rroba gjumi në pazar." Në shpifjet e mësipërme që Sali Berisha i përhap publikisht si të dhëna për qëllimin e tij të ulët të diskreditimit të personit tim publik, duke cënuar rëndë e në mënyrë të pafalshme edhe dinjitetin e nënës sime, jo vetëm nuk ka kurrëfarë të vërtete, po ka një urrejtje veçanërisht të patolerueshme për dikë që flet nga foltorja e parlamentit.

5. Duke më akuzuar deri edhe për lidhje me botën e krimit dhe si vrasës i Denis Ginës, i kallëzuari nxjerr deri edhe fjalët e mëposhtme: "I nise aferat me Denis Ginën, i cili u vra në një rrethim me policinë. E vranë me antitank... (pauzë) ...për hir të së vërtetës, të më falë zonja (është fjala për Zj. Rudina Magjistari) po mori për burrë, vrasësin e burrit të parë! Kjo është e vërteta, ti themi këto gjëra, jemi shqiptarë! Dhe iu desh kohë që të kuptonte. Iu desh që ta pësonte për të kuptuar gabimin që kishte bërë!". Nuk gjej fjalë për të shprehur indinjatën time për ultësinë e pashoqe ku ka zbritur i kallëzuari që artikulon të tilla perversitete, por theksoj, gjithnjë me përgjegjësi të plotë ligjore e morale, karakterin shpifës kriminal të këtyre sajesave fundekrye, të cilat nuk është hera e parë që deputeti Sali Berisha i kumton publikisht dhe për të cilat kërkoj hetimin e gjykimin deri në fund nga ana e drejtësisë.

6. Në vijim të akuzave të të njëjtës natyrë, për lidhje të fantazuara nga deputeti Sali Berisha me persona të akuzuar nga drejtësia për krime të rënda, i kallëzuari shprehet: "Zoti Rama, cilat janë lidhjet e tua me Aldo Baren. Transkriptimet flasin se mes tij dhe Dondollakut ti firmos si një bajloz." Dhe më tutje shton akuzat duke më quajtur kreun e një mafieje të supozuar prej tij duke thënë shprehimisht: "Unë të jap fjalën që me atë vullnet e me atë përkushtim që jam përballur në vitin 1990-91 me një sistem që duhej shembur po me atë vullnet të hekurt dhe vendosmëri përballem sot me mafian që ti kryeson!". E konsideroj absolutisht të domosdoshme transparencën e plotë lidhur me këto shpifje shumë të rënda, të cilat bashkojnë emrin tim me emra personash që s'kanë pasur të bëjnë kurrë me mua, në asnjë mënyrë, rrugë apo rast.

7. I kallëzuari shpif duke insinuuar paturpësisht: "Cila është arsyeja pse Fideli brilanton flokët dhe nuk të ndahet? Eshtë vetëm intime? Nuk besoj se është vetëm intime, jo... Sepse nuk ka dashuri të përjetshme.. E ka tjetërkund hallin ai. Unë do jua them shqiptarëve.". E sfidoj deputetin Sali Berisha t'u tregojë shqiptarëve gjithshka ai di lidhur me personin tim duke i vënë drejtësisë në dispozicion çdo fakt që ka dijeni apo provë që disponon, për të mbështetur këto turpe që ka nxjerrë nga goja duke shpifur për shkak të detyrës.

II. Sulmet e tij shpifëse ndaj personit tim i kallëzuari i përsëriti botërisht edhe në konferencën e tij për shtyp të datës 02.12.2009. Duke përmendur me emër biznesmenë të ndryshëm, ai përhapi ndaj meje sulme shpifëse me pretendimin se sipërfaqe të caktuara ndërtimi janë dhënë me firmën time në dhunim të ligjeve të shtetit.


Në vijim po riprodhoj në ligjëratë të drejtë:

"Ilir Mata ka me firmën e Edi Ramës 21.350 metër katror leje ndërtimi. Në një vendim 11 mijë metër katror, në tjetrën 9700, e tenderë të tjerë. Të gjitha janë në dhunim të pronave e ligjeve. ... Fidel Ylli, 4.320 metër katror sipërfaqe, me firmë të Kryetarit Edi Rama, 21.532 metër katror, në vitin 2008, e tëra në dhunim të hapur të ligjeve, me firmë të Kryetarit Edi Rama, sipërfaqja tjetër e Yllit të partisë, Fidelit të Ramës, 21.532 metër katror, me firmë të Kryetarit Edi Rama..."

Po në këtë konferencë përmenden edhe biznesmenë të tjerë dhe sipërfaqe të tjera ndërtimi që, në kontekstualitetin e këtij prononcimi publik, aludohet se janë dhënë prej meje në shkelje të ligjeve të shtetit. I kallëzuari, në të gjithë tekstin e konferencës së lartpërmendur për shtyp, më vendos mua kallëzuesin në krye të një grupimi që, sipas tij vepron sipas rregullave të mafies.

Në këto pohime nuk ka asgjë të vërtetë, ato janë shpifje fund e krye, të përhapura me qëllimin për të dëmtuar emrin dhe respektin që unë gëzoj ndër votuesit e forcës politike që drejtoj dhe në shoqërinë shqiptare në përgjithësi.

Kërkoj nga Ju të administroni të gjithë dokumentacionin e nevojshëm që vërteton që Kryetari i Bashkisë nuk është autoriteti i ngarkuar nga ligji për të dhënë leje apo sipërfaqe ndërtimi dhe nuk ka dhënë të tilla. I kallëzuari prej meje e di mjaft mirë këtë, por ka qëllim të deformojë me sulme shpifëse personalitetin tim publik.


Zonja Prokurore e Përgjithshme,

Thëniet e cituara më sipër, të përhapura nga Sali Berisha botërisht dhe në mënyrë të përsëritur, përmbajnë të gjitha elementet e veprës penale të shpifjes për shkak të detyrës.

Thëniet e mësipërme jo vetëm janë krejt të pavërteta, por nuk kanë as karakter të përgjithshëm. Janë thënie me përmbajtje konkrete, që prekin padrejtësisht dhe qëllimisht aspekte të jetës sime private dhe publike.

Ato plotësojnë gjithashtu, të gjitha elementet subjektive të veprës penale të konsumuar duke qënë se unë jam kryetari i partisë më të madhe opozitare. Këto thënie u artikuluan në formë sulmesh publike fill pas protestës së madhe popullore për grabitjen e votave nga ana e pushtetit që drejton i kallëzuarit Sali Berisha. Eshtë krejt e qartë se këto sulme shpifëse bëhen për shkak të detyrave institucionale dhe shtetërore që unë kryej, duke synuar të dëmtojnë personalitetin njerëzor e politik të kundërshtarit në opozitë.

Thëniet me përmbajtje shpifëse janë përhapur publikisht dhe në mënyrë të përsëritur. Ky është fakt i njohur botërisht.

Faktet e mësipërme provojnë se i kallëzuari Sali Berisha i ka konsumuar plotësisht elementët e krimit të shpifjes për shkak të detyrës, të kryer botërisht dhe më shumë se njëherë, parashikuar nga neni 240/2 i Kodit Penal.

# # #

Sulmet shpifëse të Sali Berishës ndaj personalitetit tim shoqëror, në pjesë të veçanta të fjalimeve të tij publike, bashkëshoqërohen edhe me fyerje të hapura ndaj personit tim.

I kallëzuari, i akuzuar publikisht prej meje si kryetar i opozitës për manipulim të votës së shqiptarëve në zgjedhjet e 28 qershorit, nuk është në gjendje të kontrollojë fjalët dhe nuk ndalet vetëm në sulmet me qëllim diskreditimin e rolit tim publik. Ai synon edhe cënimin e nderit dhe dinjitetit vetjak me anën e sulmeve fyese, të kryera faqe deputetëve të Kuvendit, përfaqësuesve të mediave pamore dhe të shkruara si dhe përballë opinionit të gjerë publik.


Në vijim, po citoj këto sulme fyese në ligjëratë të drejtë:

"Por ti je një përbindësh... Nga të gjithë politikanët shqiptarë ti je skllav i krimit... Provoje... vazhdo se do jetë si për ata burrat me klimaks, po ti ke qenë me klimaks tërë jetën, ti ke lindur me klimaks... Nuk mund të zgjidh unë botën tënde hormonale..."

Etiketime të tilla të qëllimshme nuk ka dyshim që janë kryekëput çnjerëzore dhe cënojnë nderin e dinjitetin tim njerëzor. Ato janë artikuluar botërisht dhe nuk kanë karakter privat, karakteri i tyre është për shkak të detyrës sime institucionale si Kryetar i forcës më të madhe opozitare dhe të detyrës shtetërore si Kryetar i Bashkisë së Tiranës. Beteja ime me Sali Berishën nuk kryhet për çështje private, por për çështje tërësisht publike dhe me interes të gjerë shoqëror, ndaj edhe sulmet e tij fyese ndaj meje duhet të cilësohen si të konsumuara për shkak të detyrës.

Lidhur me sa më sipër, kërkoj që Prokuroria e Përgjithshme t'i kërkojë Kuvendit të Shqipërisë autorizimin për të proceduar kundër Sali Berishës, për shkak se ai ka konsumuar veprat penale të shpifjes për shkak të detyrës dhe të fyerjes për shkak të detyrës, të parashikuara përkatësisht nga nenet 240/2 dhe 239/2 të Kodit Penal.

Gjithashtu, në mbështetje të nenit 62 të KPrP kërkoj që të legjitimohem në cilësinë e paditësit civil në procesin penal me qëllim mbrojtjen e interesave të mia në proces dhe shpërblimin e dëmit të shkaktuar nga veprat penale të kryera në dëmin tim nga i kallëzuari Sali Berisha.

Bashkëlidhur këtij kallëzimi:

- Një kopje elektronike dhe të printuar fjalën e të kallëzuarit në Kuvendin e Shqipërisë si dhe fjalën në konferencën e shtypit në foltoren e Kryeministrisë.

- Kopje të gazetave të mëposhtme, të datës 27.11.2009, të cilat kanë pasqyruar fjalën e Z. Berisha në Kuvendin e Shqipërisë si më poshtë :

- Gazeta "Rilindja Demokratike",

- "Gazeta Shqiptare"

- Gazeta "Panorama",

- Gazeta "Korrieri",

- Gazeta "Shekulli".


- Kopje të gazetave të mëposhtme të datës 03.12.2009 të cilat kanë pasqyruar fjalën e Z. Berisha në konferencën e shtypit në foltoren e Kryeministrisë si më poshtë :

- "Gazeta Shqiptare"

- Gazeta "Shekulli",


- Gazeta "Shqip",

- Gazeta "Korrieri",


- Gazeta "Koha Jone".

Me respekt,
Kallëzuesi

Edi Rama 
 


Në cilësinë e Kryetarit të PSSH dhe të Kryetarit të Bashkisë së Tiranës 


***********


Ne daten 18 shtator nena e Edi Rames iu drejtua gjykates me padi ndaj Berishes.

TIRANË - Nëna e Edi Ramës vendos të thyejë heshtjen përpara shpifjeve të kryeministrit Berisha. Aneta, gruaja emri i së cilës është përfolur nga kryeministri në çdo dalje publike i është drejtuar dje Gjykatës së Lartë. Ajo ka zgjedhur rrugën ligjore për tu përballur me njeriun që për vite me radhë e ka sulmuar publikisht.


Aneta Rama shpjegon në padinë e saj marrëdhëniet me të birin dhe tregon ndjesitë e një nëne që përbaltet pothuajse çdo ditë nga politika shqiptare. "Thëniet e kumtuara prej Sali Berishës nga tribuna e Kuvendit të Shqipërisë janë të krijuara prej të akuzuarit për qëllimet e tij.


Këto "fakte" janë tërësisht të pavërteta, nuk i përgjigjen asgjëkund realitetit", - thuhet në padinë e znj. Aneta Rama. "Shekulli" publikon të plotë padinë e shkruar nga nëna e kryetarit të Partisë Socialiste, Edi Rama.


E nderuar zonja Kryetare!


Në cilësinë e personit të dëmtuar nga vepra penale e kryer, me anën e kësaj kërkese për gjykim, shpreh vullnetin tim për të gjykuar shtetasin Sali Ram Berisha, me detyrë Kryeministër i Republikës së Shqipërisë, pasi botërisht ka konsumuar në dëmin tim veprën penale të shpifjes, parashikuar nga neni 120/2 të Kodit Penal.


Vepra e mësipërme është konsumuar në Kuvendin e Shqipërisë, gjatë fjalës së mbajtur prej të akuzuarit prej meje në seancën plenare të datës 26.11.2009. Në këtë seancë, Sali Berisha shqiptoi në ligjëratë të drejtë në adresën time fjalët e mëposhtme: "Tani do t'i them zonjës: kam shumë respekt për ty po do ishte në nderin tënd dhe të integritetit tënd që t'u tregosh shqiptarëve që e ke mjekuar djalin tënd 10 vjet për skizofreni! ... dil me kurajë si nënë shqiptare dhe thuaju të vërtetën, e ngrihu mbi sentimentet e një djali që të ka nxjerrë me lecka, nga shtëpia e tij, me rroba gjumi në pazar."


Nga këto thënie dalin në pah dy momente me përmbajtje shpifëse në dëmin tim:
1. Në fjalën e tij i akuzuari prej meje më bën thirrje që të dal e t'iu tregoj shqiptarëve se djalin tim Edi Rama e paskam kuruar për 10 vjet nga sëmundja e skizofrenisë.


jo është një shpifje që synon të ulë dinjitetin tim si nënë para syve të mbarë opinionit publik sepse, sipas Sali Berishës, megjithëse e ndërgjegjshme për sëmundjen e tim biri, e cila në fakt është absolutisht një trillim i njeriut që sot akuzoj, unë nuk paskam as kurajën dhe as sinqeritetin që t'ua bëj atë të ditur shqiptarëve, me gjithë përgjegjësinë që kam ndaj tyre si qytetare dhe si nënë shqiptare.


2. I akuzuari prej meje, Sali Berisha, shpif edhe kur përhap thënie të pavërteta sikur im bir, Edi Rama, më paska dëbuar, duke më nxjerrë nga shtëpia në rrugë me rrobat e gjumit. Ky fakt është i pavërtetë dhe me përmbajtje shpifëse që synon të zhvleftësojë para opinionit publik personalitetin tim të krijuar një jetë të tërë me punë të ndershme e marrëdhënie gjithnjë korrekte me shoqërinë.


Thëniet e mësipërme të kumtuara prej Sali Berishës nga tribuna e Kuvendit të Shqipërisë janë të krijuara prej të akuzuarit për qëllimet e tij. Këto "fakte" janë tërësisht të pavërteta, nuk i përgjigjen asgjëkund realitetit. Në thëniet e sipërcituara plotësohen të dy elementët objektivë të domosdoshëm për ekzistencën e figurës së veprës penale të shpifjes.


Nga ana tjetër, është i kuptueshëm qëllimi i posaçëm dhe i kundërligjshëm i autorit, i cili synon të ulë dinjitetin tim njerëzor dhe respektin që unë gëzoj në shoqëri. Në rastin e parë kërkon të më paraqesë para opinionit publik si një grua të pasinqertë dhe të papërgjegjshme për fatin e bashkëqytetarëve të saj, kurse në rastin e dytë, i akuzuari synon të njëjtin qëllim, por në kontekstin e një nëne pa dinjitet, të cilën i biri e flak për leckash në rrugë.


Në të dyja rastet, qëllimi kriminal i Sali Berishës shkon në drejtimin e paracaktuar nga mendësia e tij për të diskredituar publikisht jo vetëm kundërshtarin e tij politik, por edhe njerëzit e afërt të familjes.


Për këto arsye, Sali Berisha duhet të gjykohet, sepse ka konsumuar ndaj meje veprën penale të shpifjes, të kryer botërisht, faqe deputetëve të Kuvendit dhe përfaqësuesve të mjeteve të informimit publik, e cila sanksionohet sipas nenit 120/2 të Kodit Penal.


Lidhur me sa parashtrova, i kërkoj Gjykatës së Lartë që të caktojë një datë për të marrë në shqyrtim këtë kërkesë për gjykimin e të akuzuarit Sali Berisha, për kryerjen e veprës penale të shpifjes, të kryer botërisht në dëmin tim.


Gjithashtu, në mbështetje të neneve 58 e vijuese të K.Pr.P kërkoj që të legjitimohem në cilësinë e paditësit civil në procesin penal, me qëllim paraqitjen e kërkimeve në proces për shpërblimin e dëmit të shkaktuar nga veprat penale të kryera në dëmin tim nga i akuzuari.


Bashkëlidhur kësaj kërkese ju paraqes:


- Në kopje elektronike dhe të printuar fjalën e të akuzuarit prej meje zotit Berisha, mbajtur në Kuvendin e Shqipërisë në datën 26.11.2009.
- Kopje të gazetave të mëposhtme, të cilat kanë pasqyruar fjalën e Z. Berisha në Kuvendin e Shqipërisë të datës 27.11.2009:
- Gazeta "Rilindja Demokratike",
- "Gazeta Shqiptare"
- Gazeta "Panorama",
- Gazeta "Korrieri",
- Gazeta "Shekulli".
E dëmtuara akuzuese
Aneta Rama
Përfaqësuar nga avokatët Arian Salati e Eno Bushi
Tiranë, më 18 dhjetor 2009

KËRKESË PËR GJYKIM

E DËMTUAR AKUZUESE: Aneta Rama, e bija e Petros dhe Amalisë, e vtl. 1938, lindur në Vlorë dhe banuese në Tiranë, në adresën rr. "Muhamet Gjollesha", nr. 20, të përfaqësuar me prokurë të posaçme nr. 3013 rep., nr. 633 kol., datë 14.12.2009 nga avokatë Arian Salati e Eno Bushi.

KUNDËR: Sali Berisha, Kryeministër i Republikës së Shqipërisë, i biri i Ramës, i vtl. 1944, lindur në Viçidol, Tropojë dhe banues në Tiranë, me adresë Këshilli i Ministrave i RSH, Blv. "Dëshmorët e Kombit", Tiranë.

ME OBJEKT:
1) Gjykimin e të akuzuarit Sali Berisha, për kryerjen në dëmin tim të veprës penale të shpifjes, të kryer botërisht, parashikuar nga neni 120/2 i Kodit Penal;
2) Legjitimimin e personit tim në cilësinë e paditësit civil në procesin penal ndaj të akuzuarit prej meje, me qëllim procedimin e të akuzuarit dhe shpërblimin e dëmit të shkaktuar.

MBËSHTETJA LIGJORE: Neni 141 i Kushtetutës së RSH, nenet 58, 59, 60, 75/b dhe 62 të KPrP.
DREJTUAR: GJYKATËS SË LARTË TIRANË
a padit S.Berishën: Shpifje dhe fyerje për shkak të detyrës
www.shekulli.com.al/