Identifikohu

Fierza fryhet sërish, ujërat vetëm 3 metra larg katastrofës








Në liqenin më të madh ujëmbledhës në kaskadën e Drinit, niveli i ujërave është rritur me shpejtësi, duke mbërritur në 292.7 metra, nga 296 metra që është pika maksimale e digës



Rritja me shpejtësi e nivelit të ujërave gjatë ditës së djeshme në liqenin e Fierzës ka përkeqësuar situatën hidrike, duke i çuar ujërat e ujëmbledhësit më të madh të kaskadës në prag të katastrofës. Shkrirja e borës, si pasojë e rritjes së ndjeshme të temperaturave gjatë 24 orëve të fundit, ka rritur alarmin në liqenin e Fierzës, në basenin e të cilit janë ngritur hidrocentralet kryesore në vend. Sipas të dhënave më të fundit nga KESH-i, prurjet në hidrocentralin e Fierzës si rezultat i rritjes së temperaturave, sot janë dyfishuar, duke shkuar në 800 metra kub ujë në sekondë, nga 400 metra kub ujë në sekondë, që ishte një ditë më parë. Kjo ka sjellë shtimin e prurjeve, duke bërë alarmante situatën në një prej hidrocentraleve më të mëdhenj në vend. Uji ka tejkaluar edhe pikën kritike në liqenin e Fierzës, duke arritur në 292.1 metra, ose 3 metra larg pikës kritike. Kapaciteti maksimal i liqenit të Fierzës është 296 metra dhe nëse tejkalohet ky nivel, atëherë kjo mund të jetë një prag katastrofë e vërtetë. Pa asnjë rrugëdalje, KESH-i ka hapur sërish portat e shkarkimeve në tre HEC-e. Nga Fierza po shkarkohen 400 metra kub ujë në sekondë, nga Vau i Dejës 1200 metra kub ujë në sekondë dhe nga hidrocentrali i Komanit 1000 metra kub ujë në sekondë. Sipas të dhënave më të fundit, në të tre hidrocentralet prodhimi i energjisë elektrike ka arritur kuotën maksimale historike ditore mbi 28 milionë kilovat/orë, por sërish kjo sasi prodhimi nuk mund të sjellë shpresa për ulje të nivelit të liqenin. Situata në kaskadën e Drinit mbetet alarmante, sepse me këtë nivel prurjesh, edhe pse hidrocentralet punojnë me gjithë fuqinë e tyre, niveli i Fierzës po vazhdon të rritet.

***

Por pavarësisht rritjes së shpejtë të nivelit të ujërave në kaskadë si pasojë e prurjeve të shumta, ministri i Ekonomisë, Dritan Prifti, duket se është i sigurt në menaxhimin e situatës. Prifti ka deklaruar gjatë ditës së djeshme në një konference për shtyp, se “ situata në kaskadën e Drinit gjatë 24 orëve të fundit është përmirësuar, për shkak të prodhimit maksimal të tij me 28.8 milionë kilovat/orë energji, nga e cila kemi konsumuar 23.2 milionë kilovat/orë, ndërsa pjesa tjetër është eksportuar dhe nga shkarkimi i skajshëm kemi mundur që në Fierzë të ulim nivelin e ujit me 75 cm. Ne kemi eksportuar gjatë orëve të fundit një sasi energjie prej 12.2 milionë kilovat/orësh. Ndërkohë, OSSH importon 7.4 milionë kilovat orë’’, tha ministri. Duke parashtruar të dhënat e fundit mbi situatën, Prifti tha se “për momentin niveli i ujit në Fierzë është 292 metra, në Koman 174, 4 metra dhe gjatë natës ka pësuar rritje për shkak të shkarkimeve në Fierzë”. Sipas tij, në Fierzë po punohet me kapacitet të plotë me katër turbina, në Koman shkarkohet 1 000 m3/s punohet me katër turbina dhe Vau i Dejës shkarkon 1 200 m3/s dhe punohet me pesë turbina. Ministri sqaroi se “situata është nën kontroll dhe e disiplinuar për momentin, por varet shumë edhe nga kushtet e motit, të cilat parashikohen që të vijojnë më reshje në ditët në vijim”, duke shtuar “këtë emergjencë po e monitorojmë nga afër me grupe të tëra të KESH-it, OST-së, OSSH-së dhe të ministrisë, të cilët janë në vëzhgim të vazhdueshëm pa pushim për të bashkëmenaxhuar situatën me grupet e gatshme atje”. Por situata nuk duket shumë e qetë, pasi ka qenë vetë kreu i qeverisë, Berisha, i cili ka dhënë alarmin për evakuim të banorëve, pasi të gjithë ata që jetojnë në zonën e Nënshkodrës mund të përballen me fatkeqësi të mëdha. Ndërsa për kreun e Ministrisë së Ekonomisë ende niveli i ujërave nuk mund të thuhet se ka mbërritur në atë pikë, ku hapja e portave do të shkaktonte përmbytje të mëdha. “Dëm shumë më i madh mund të vinte nga rritja e nivelit të Fierzës, 296 metra, i cili është niveli maksimal i liqenit , dhe kalimi i këtij niveli do të na çonte në katastrofë kombëtare. Kemi evituar një katastrofë, duke kontrolluar nivelin dhe shkarkimet”, - tha Prifti. Duke dhënë edhe sqarimet e situatës në kohë reale, ministri i Energjetikës ka deklaruar se është duke u konsultuar me specialistët më të mirë të fushës së energjetikës në vend. “Unë kam thirrur në konsultime private ekspertët më të mirë në vend të energjetikës, ata që sot paguhen për këtë punë, por edhe ata që kanë punuar në energjetikë për shumë dekada, si Farudin Hoxha, Jorgaq Kaçani, Marenglem Gjonaj, Stavri Peci, Bardhyl Shehu, Astrit Qemo, Sotiraq Pandazi, duke dashur në këtë mënyrë të bëjmë më të mirën e mundshme”, tha Prifti.